اللحظات السحرية من حياتي ممحيةة

- اليوم الصبح و أنا بجهز بحالي للدوام ، 👗
إضطريت أحط بؤبؤ عيني بزاوية غير معتادة ، عشان أقدر أمسك شعرات رموشي من شروشهم بطعاجة الرموش و أطعجهم طعجة تخليهم واقفات وقفة سلام ملكي ! 💂🏻‍♀️
و كنت قاعدة برقص راب و بغني ( ي رموشها ، أها اها ، حلوينزيسيف ياو ياو ) 🗣
وقعت عيني على شغلة سودة غريبة واقعة بين الخزانة و الحيطة !
رحت انبطحت ع بطني ، و مديت إيدي عالآخر زي لوفي الشب المطاطي ، و تفعفلت و تشعتلت تا كمشتها و سحبتها 🦎
قمت حيلي إلا هي نضارة شمسية عندي من خمس سنين و مضيعتها و كنت فاقدة الأمل ألاقيها ! كتيت الغبرة عنها زي الأفلام لما يلاقوا اشي سحري من الزمن الفرعوني ! 🏺
فاتت الغبرة بين نخاعي الشوكي و عصعوصي ، و صرت أعاطس زي ضفدع شرقان و معه التهاب مريئي ، بعد ما سيطرت على جهازي التنفسي ، تزكرت كلام اللايف كوتش عيسى عساف ، لما حكى أنو لازم نبحث عن اللحظات السحرية بتفاصيل يومنا و نحاول نستغلها كبصيص أمل و تفاؤل ! 🔮
فحكيت ولله لألبسها اليوم بلكي جابتلي الحظ الحلو و كانت عنجد الكنز المفقود .. ⚱️

وصلت الموقف يلي بستنا فيه التكسي ، و أنا مشخصة و طاقعة هالنضارات و مناخيري عاملين ارتداد علوي من شوفة الحال ! 😎
بتفاجئ أنو الكراش ( الشب الي واقعة بغرامه من طرف واحد ) واقف بالشمس بستنا تكسي برضو ! 😱
صراحة حزت بنفسي ( كيف هيك النعمة مرمية بالشارع ؟ مش حرام ؟ لازم أشيله أكته و أبوسه و أحطه عالسور ) 💔
بس الحلو ي جماعة ، انو جد طلع للنضارة مفعول !! جد طلعت بتجيب الحظ ! ولكو كنت استنا اشوفه استني ! كنت أنذل ! كنت أجيب وصفات من النت لاستحضار الأرواح ! بس عبث !
ما بشوفه غير صدف و أنا بأسوء حالاتي و أكعفش مناظري !
المهم هسا شفته و أنا مطقمشة بالنضارة كمان 😍🙊


وقفت قدامه ، أعطيته ضهري و قصعت خصري ، عملت حالي ولا شايفته ، مع إني عيني نخزق بياضها و سحسل و دحل بؤبؤي منه قد ما حاولت أنظر أقصى اليمين الخلفي ، 👀
المهم و انا واقفه بكامل كبريائي و ثقتي بنفسي ، مرق واحد دواوين بسيارته الواقعة و شحط و وقف قدامي و حكا ( علامكي شايفة حالكي ؟ منظركي قايل مثل ذِبان الغور ) 👽
الكراش فقع ضحكة شهق فيها من مناخيره ! 🗣
صح انها أحلى ضحكة بالعالم و زي العسل ، بس الله يلعنك يا كلب يا حلو يا ريتو الله يجوزني ياك يا حقير ليش تضحك ! 😡


مش هون الحبكة ، الحبكة إني قررت أغادر و أتبخر بأسرع وقت ممكن فلفيت ضهري بأقوى ما عندي و أنا منزلة راسي و مشيت ، خبطت بعامود كهربا و تشعتلت لورا ، عليم الله حسيت جبهتي صارت مقعرة للداخل و دماغي وقع جوا حلقي ، 💥
فتحت عيوني صرت اشوف الدنيا نص أبيض و نص أسود ! نص ملون و نص مش ملون !!
خف عقلي ايش في شو صار فقدت البصر ؟!
فش وقت افكر شو قاعد بصير معي بس أبعد من هالمكان بتفقد بصري !
ضليت ماشية بأسرع ما عندي و أنا بدعي إنو الأرض تنشق و تبلعني أو يوقع علي مجسم هلامي عملاق يبتلعني ! 🏃🏻‍♀️
فجأة سمعت صوت الكراش بنادي علي ، 😳😍
لفيت متلهفة و حكيت معقول بدو يتطمن علي ! معقول سحر النضارة هاد ! 😍
لفيت لقيته حامل عدسة نضارتي الشمال المكسورة و الواقعة من النضارة الي ع وجهي ، و مسخسخ ضحك ! قلي ( ههههه هااي ههههه هاا هااي وق ههههه وقعت هههههه لو شديتي حيلك شوي بس هههههه كان دانك كمان وقعت ههههههه ) 🙃


ولك الحق مش عليك ، الحق عالسكربينة الي معجبة فيك ، ولك ي خسارة الدفاتر و القلام و المشاعر الي كنت ارميها بالعمد قدامك عشان تلحقني فيها ! ما كان ضايل غير اشلحلك كندرتي زي ساندريلا لولا جراباتي مخزقة كان عملتها ، ولك الله يسخطك لمثلث ، ولك الله لا يهنيك بنضارة بتشتريها ! يلعنك و يلعن هالضحكة ،.. 🙂
المهم اخدت منه العدسة و رميتها عالأرض و دعست عليها قدامه و قلتله (ما دخلك) ونا ع وجهي لسا النضارة المكسورة
و ضليت رايحة ،
أي ثينك انو لهسا محشش و بحكي القصة لكل حدا بشوفه و يمكن نزلها مقاال

المصدر: منتديات بنات فلسطين - من قسم: النكت والطرائف

المشاركة الأصلية كتبت بواسطة البريئة ! ههههههههههه كلوو من النظارة يسعدك ربي .

المشاركة الأصلية كتبت بواسطة مؤيد هههههههههههههه شو هاي بنت ولا شله محششه يخرب بيتها ما اطول لسانها